Ale zacnymy łod poczontku. Szpil miôł sie łodbyć ło 18:00, ale goście mieli awaria autokaru bez co musieli przesiōnść sie na swoje auta i jechać do Chorzowa na szpil. Łostatycznie przijechali trocha po osiymnostyj beztôż delegat zaproponowôł godzina 18:30.
Kybice przinôjmynij zdōnżyli wsziscy wlyźć na sektory zanim zabrzmiôł piyrwszy gwizdek. Tyn zabrzmiôł niy ło 18:30, a ło 18:36. Ale grunt, że rywale stawiyli czoła drużinie Ruchu mimo tego, że jesce wczorej mogli do nôs niy przijechać wcale (we zapowiydzi pisalimy, że klub potwierdziôł przipadki COVID-19 i klub ze Nysy czekôł na oficjalny komunikat klubu, czy majôm jechać na szpil, czy niy).
Łod poczōntku szpilu przi balu bōł Ruch, ale zagynszczonô i mocno skonsolidowano łobrona gości niy pozwalôła na wiela łokazji. Te miôł Paszek, kiery dwa razy ugrôł ek do Ruchu, ale nic wiyncyj ze tego szpilanio niy wynikało. Pod koniyć połowy kybice ze trybuny zacli sie już nyrwować, że niy grômy do przodka, ale po prostu niy bōło takij możliwości.
We 34 minucie fajno łokazjo mieli fusbalorze Polonii. Kole 35, może 40 metra bōł Redak. Przifasolōł jak ze armaty, Bielecki wyciōng sie jak dugi, ale bala trefiōła we lata! Uff! Odetchnyli wsziscy kybice.
Ruch szukôł lokazji, ale tako richtig fajno dostôł dopiyro we 45 minucie. Winciersz miôł bala, eknoł sie, ale ta trefiōła do Foszmańczyka. Miynko wciepa do niy upilnowanygo Idzika, a Mariusz ze kepy szczelōł swojigo 11 tora we lidze! EINS!
Po pauzie goście sie łodkrywali, co stwarzało nôm wiyncyj łokazji, a fekety tych łokazji bōło widać we 61 minucie szpilu. Fosa przi balu, fajnie wciep tormanowi – Kowalczykowi – bala za kragiel! ZWEI!
Dziysiynć minut potyn Wini podôwo do Idzika, tyn pognôł ze balym i łodegrôł na środek elwra gości, tam stôł Fosa kiery prostopadle uruchomiōł Winciersza. Wini bōł sôm na sôm i wcis bala do tora. DREI!
Zmiany dzisiej bōły ino po to, coby dać drużinie łodpoczōnć, a ławce dać wiyncyj pograć. Wlyźli Będzieszak, Neugebauer, Swikszcz i Rudek. Tyn łostatni bez szczynścio do torów, ale ino do dzisiej. 87 minuta szpilu, Rudi dostowô bala kole 16 metra i szczylo. Kowalczyk zaskoczony, a bala we nycu! VIER!
Tak richtig, to Ruch côłki szpil grôł, a rywale próbowali nôs blokować, ale to nôsze panowanie na szpilplacu bōło dzisiej kluczem do sukcesu.
Nôsz plus szpilu: Fosa! Rozgrywôł dzisiej super szpil, dogrywôł piynkne bale, a już ta, do Winiego na 3-0 to klasa mistrzowsko! Fest dzisiej zasłużôł na wyróżniynie i łod nôs je dostôwo.
Ruch Chorzów – Polonia Nysa 4-0 (1-0)
Skład Ruchu: Bielecki – Kulejewski, Kawula, Kasolik – Winciersz, Duchowski, Sikora, Kwaśniewski, Foszmańczyk – Idzik.
Skład Polonii: Kowalczyk – Izydorczyk, Błaszkiewicz, Fedorowicz, Redak, Bobiński, Perkowski, Narcisse, Mamis, Ostrowski, Setla.
Tory: 45 min. Mariusz idzik, 61 min. Tomasz Foszmańczyk, 71 min. Mateusz Winciersz, 87 min. Jakub Rudek.
Napisz komentarz
Komentarze