Zaległości łodrobiōne na 4+! Ruch Chorzów – Zagłębie II Lubin 4-0 [RYLACJA]

Do Chorzowa przijechały rezerwy Zagłębia Lubin, ale przijechały w zasadzie samymi juniorami. Niy dziwne, bo piyrwszo drużina gro szpile we Ekstraklasie, a tukej jednak bōł szpil we III Lidze, cyli aż 4 poziomy rozgrywkowe niżyj.

Poczōntek szpilu to takie – cytujônc klasyka – piłkarskie szachy. Trocha my, trocha łoni, ale to Ruch miôł wiyncyj sytuacji, a we 20 minucie dziynki szczylaniu trefiōła sie rynka we elwrze! Do bala podszed Mariusz Idzik – bo fto by inkszy môg tam podlyźć – i szczelōł trocha we środek, trocha we swoja lewo strona, a torman ciep sie we prawo. EINS!

Do pauzy Ruch miôł jesce 3 łokazje, ale rôz Wini niy zdonżōł przed tormanem do bala, rôz Fosa szczelōł trocha za słabo i na pauza prowadzilimy ino 1-0, ale trza dodać, że goście nôs niy zaskoczyli na tyla, coby ugrać jakoś 100 procyntowo akcja.

Po pauzie zacli my dalyj grać swoje i we 49 minucie, po faulu Galasa na Foszmańczyku bōła łokazja do szczylanio. Kole 18 metra bala ustawiōł sie Mariusz Idzik. Nabiyg na bala a`la Lewandowski i? Pajônki ze łokiynka musieli szibko pitać, bo ta bala wlazła we same łokiynko! ZWEI!

Ruch niy zwalniôł tympa, chocioż szibkie 4 smiany trynera Adama Buczka miały nôm narobić kole elwra, tam jednak dzisiej fest dobro para stoperów stopowała wszistkie łokazje, a szczały ze dystansu chytôł Bielecki.

We 78 minucie Wini, kiery zacōn na lewyj, a kończōł na prawyj pomocy zloz do środka i szczelōł we lata, po dobitce bala wylazła na ek. Sôm Wini wykonywôł tyn ek, a że mielimy tako taktyka, że co jakiś czos drużina właziła tormanowi gości do tora, to musiŏł cyntrować fest głymboko. Bielikow niy spodziewôł sie, że bala łodbije sie łod niygo i wleci do tora ze samygo eku! Tora my by uznali Winiemu, bo torman niy zareagowôł, jedynie bala łodbiōła sie mu łod rynki, ale już znajdujymy informacje, że to jednak bōł selbstor.

Côłko drugo połowa to Ruch kontrolowôł gra, ale niy tak „na niby” ino tak richtig. Łodpuścili na 2 minuty i zaś pełno dominacjo! We 90 minucie zaś wciepka ze eku, bala dostôł wracajōncy po pauzie Mokrzycki i dobiōł rywala! 4-0!

Syndzia dołożōł 4 minuty, ale bez tyn czos nic już sie niy działo godnygo uwagi. Zalygłości łodrabiōmy na 4+!

Nôsz plus szpilu: Mariusz Idzik! Do Chorzowa przijechała nôjlepszo defensywa (przed szpilem z Ruchem mieli 11 straconych torów), Idziu miôł 13 szczylonych torów, a Adam Żak ze Polonii Bytom już miôł 15. Idziu dokłado 2 tory i razym ze Żakiem przewodzi klasyfikacji króla szczelców we nôszyj grupie! Zrobiōł dzisiej kawał dobryj roboty tymi torami, a za te łokiynko, to już mô mój szacunek do końca kariery!

Ruch Chorzów – Zagłębie II Lubin 4-0 (1-0)

Skład Zagłębia II: Bielikow – Rogalski, Lepczyński, Kruk, Hanc – Kizyma, Galas, Zynek, Dudziński, Więcek – Kusztal.

Skład Ruchu: Bielecki – Kwaśniewski, Kawula, Kasolik, Będzieszak – Sikora, Duchowski, Winciersz, Foszmańczyk, Paszek – Idzik.

Tory: Idzik 20 (elwer) i 49 min. ; Winciersz 79 min. (bezpośrydnio ze eku) ; Mokrzycki 90 min.

Szpil szło słuchać we Radiu Widzew, kaj komyntowôł je Dejvid, a odsłuchać rylacja możecie tukej => LIVE Ruch – Zagłębie II

---

Życie na Niebiesko