Kolyjny krok do awansu wykonany! – Ruch Chorzów – Gwarek Tarnowskie Góry 5-1 [RYLACJA]

Skład Ruchu fest niy zaskoczōł, ale coby znalyźć plac do 2 młodziyżowców, Paszka, Ecika i Winiego trza bōło przebudować ustawiynie. Ecik zacôn we środku, Wini na lewyj, Pachu na prawyj, a Fosa ze Sikorą na defensywnych pomagierach.

Poczôntek szpilu bōł spokojny, ale to barzij za sprawom aury jako dzisiej panowała we Chorzowie – zimno, kole 5 stopni, mgła i srogo wilgoć – ale łod 10 minuty bōło widać fto chce grać we fusbal, a fto bronić tora.

Nôjpiyrw kepa Idzika, potyn szczał Paszka, ale wszistko jesce chytoł torman Gwarka. Chytoł tak do 15 minuty szpilu. Bala dostôł Łukasz Janoszka – akcja zacon Fosa, kiery uruchomiōł Idzika, tyn pocis bala we poprzek szpilplacu, ta przelajzła do Paszka kiery łodegroł do Ecika, a tyn sloz na lewo noga i precyzyjnie szczelōł we długi róg. Wiśniewski wiyciōng sie jak struna ale musiôł wyciōngać bala ze tora! EINS!

Po torze bōło widać, że Ruch niy łodpuści, a juz we 22 minucie bōł efekt. Wolny, cynter Ecika we wolne pole, tam szczupakiym ciepie sie Sikora kiery kepom ładuje bala do tora! ZWEI!

Do 30 minuty szpil pod pełnom kontrolom Ruchu, ale potyn sie trocha my zastali i trocha wiyncyj mogli poszpilać goście. We 36 minucie cynter – taako świeca – we nôsz elwer, bala slatuje Bieleckiemu do łapów, ale wylatuje mu ze nich, szczylo Siwek, a bala kajś znojdła droga do tora. EINS DO GOŚCI!

Szibko zapomniyli my ło tyj sytuacji i do pauzy chcieli my przetrwać ze wynikiym 2-1. Tak tyż sie stało, bo syndzia niy dołożōł nic do tyj halbzeity i po 45 minutach mielimy 2-1.

Po pauzie nic sie niy zmiyniōło. Gra toczōła sie na połowie Gwarka, jak i we piyrwszyj połowie szpilu. Nostympny tor do Ruchu wisiôł we lufcie. We 67 minucie szpilu cynter, zamiyszanie i bala łodbijo Kawula, ta slatuje do Idzika kiery miôł pusty tor. Idziu takie bale wykorzistuje i terôzki tyż niy bōło inaczyj! DREI!

We 71 minucie ek do Ruchu. Ecik dokładnie cyntruje na kepa Kawuli, a tyn? Wali do tora! Szibko bōło juz 4-1!

Tryner gości zrezygnowany barzij starôł sie pilnować, coby niy sfalić u nôs 10-1, wiync zmienōł napastnika – kiery miôł nôjlypsze CV na szpilanie, ale komplytnie niywidoczny – i wprowadziōł fusbalorzy barzij defensywnych, a Ruch dalyj cis i szôł jak po swoje!

We 90 minucie wpuszczony wcześnij Michał Mokrzycki dostoł bala kole 17 metra. Miôł czas, plac, pomysł. Uderzôł i ustalōł we tyn sposób wynik szpilu na 5-1! Tym razym syndzia tyż niy dokłôdoł juz nic do tyj połowy i zakończōł szpil po 90 minutach szpilanio.

Trza pedzieć, że spodziywali my sie łatwyj wygranyj, ale łobstawialimy 3-0. Zamiast tego zoboczyli my aż 6 torów, ze czego 5 łod fusbalorzy Ruchu Chorzów! Pewno wygrano i kolyjny krok do awansu wykonany!

Nôsz plus szpilu: Ecik! Trza tukej wiyncyj pisać? To napiszymy! Skopany we Pucharze ze Podlesianką, dzisiej zagrôł 81 minut. 2 asysty i tor przednij klasy! To chyba jest srogo robota coby tego plusa dostać. Gratulujymy Łukaszowi udanygo wystympu i życymy kolyjnych na takim samym poziomie.

Ruch Chorzów – Gwarek Tarnowskie Góry 5-1 (2-1)

Skład Ruchu: Bielecki – Kwaśniewski, Kasolik, Kawula, Będzieszak – Sikora, Foszmańczyk, Winciersz, Janoszka, Paszek – Idzik.

Skład Gwarka: Wiśniewski – Dyląg, Dzido, Kulisz, Obuchowski – Timochina, Kuliński, K.Joachim, Siwek, Pączko – Jarka.

Tory: 16 min. Janoszka, 22 min. Sikora, 67 min. Idzik, 71 min. Kawula, 90 min. Mokrzycki – 36 min. Siwek

Szpil szło słuchać we Radiu Widzew, kaj komyntowôł je Dawid Godziek i Maciej Wojciechowski, a odsłuchać rylacja możecie tukej => Ruch – Gwarek

----

Dawid Godziek / Życie na Niebiesko